மழையால் பாதிக்கப்பட்ட சாலை, கால்வாய்கள் சீரமைக்கும் பணிகள் பொங்கல் முடிந்தவுடன் தொடங்கும் – உதயநிதி ஸ்டாலின்

சென்னை சேப்பாக்கம் – திருவல்லிக்கேணி சட்டமன்ற தொகுதிக்குட்பட்ட 17 இடங்களில் 4 கோடி மதிப்பிலான RMU எனும் நவீன ‘ வளைய சுற்றுத்தர அமைப்பு ‘ இயந்திரங்களின் செயல்பாட்டை மின்சாரத்துறை அமைச்சர் செந்தில் பாலாஜியுடன் இணைந்து சட்டமன்ற உறுப்பினர் உதயநிதி ஸ்டாலின் தொடங்கி வைத்தார்.

துணை மின் நிலையங்களில் இருந்து வரும் மின்சாரம் RMU எந்திரங்களின் வழியே மின்மாற்றிகளுக்கு அனுப்பப்படுகின்றன. மேலும் குறைந்தபட்சம் இரு மின்வழிப்பாதைகளுடன் இந்த எந்திரங்கள் இணைக்கப்படுவதால் ஒரு மின்வழிப் பாதையில் மின் பழுது ஏற்பட்டாலும் மற்றொரு மின்வழிப்பாதையின் மின்சாரத்தை மின் தடை ஏற்பட்ட பகுதிக்கு இந்த இயந்திரம் மூலம் அனுப்ப முடியும் , எனவே மின் தடைகளை குறைக்கவும் இந்த வளைய சுற்றுத்தர அமைப்புகள் உதவுகின்றன. கட்டுப்பாட்டு அறைகளிலிருந்தே இந்த எந்திரங்களை இயக்க முடியும் என்பதால் மழைக்காலங்களில் மின் விபத்து ஏற்படுவதை தவிர்க்கவும் இந்த இயந்திரங்கள் உதவுவதாக மின்வாரியம் சார்பில் தெரிவிக்கப்பட்டுள்ளது.

எந்திரங்களின் செயல்பாட்டை தொடங்கி வைத்த பிறகு செய்தியாளர்களை சந்தித்த உதயநிதி ஸ்டாலின்

உதயநதி ஸ்டாலின் பேட்டி

” சேப்பாக்கம்- திருவல்லிக்கேணி தொகுதியில் பழுதடைந்த நிலையில் இருந்த RMU எந்திரங்களை மாற்றித்தர வேண்டும் என்றும் , மழை நாட்களில் பல இடங்களில் RMU எந்திரங்கள் மழைநீரில் முழ்கியதால் அவற்றின் உயரத்த்தை 1 மீட்டர் உயர்த்தித் தர வேண்டும் எனவும் தொகுதி மக்கள் கோரிக்கை விடுத்தனர்

அதனை ஏற்று சேப்பாக்கம் தொகுதியில் 4கோடியில் 27 இயந்திரங்கள் புதிதாக அமைக்கப்பட்டுள்ளன. அவற்றில் 17 இயந்திரங்களின் செயல்பாடு தொடங்கி வைக்கப்பட்டுள்ளது.

சேப்பாக்கம் தொகுதியில் மழையால் பாதிக்கப்பட்டுள்ள சாலைகள் குறித்து கணக்கெடுத்துள்ளோம். பொங்கல் முடிந்தவுடன் சாலைகள் , கால்வாய்களை சீரமைக்கும் பணிகள் தொடங்கும் ” என்று கூறினார்.